19 чэрвеня адбылося свята вёскі Баравікі. Свята арганізавана аўтаклубам пры падтрымцы Мокраўскага сельвыканкама і ААТ “Агра-Калядзічы”.

Народны майстар Рэспублікі Беларусь Марыя Мікалаеўна Кулецкая правяла майстар-клас па выцінанцы у сярэдняй школе № 1 г.Пружаны.

Хлопчыкі і дзяўчынкі даведаліся аб гісторыі гэтага віду дэкаратыўна-прыкладнога мастацтва, асаблівасцях стварэння твораў з паперы, іх прызначэнні і распаўсюджанні на нашых землях.

Акрамя таго дзеці з дапамогай вядомага майстра паспрабавалі стварыць прыгожыя ўзоры і кампазіцыі з паперы.

Падчас летняга адпачынку нельга забываць пра бяспеку. Аб гэтым у чарговы раз вырашылі нагадаць работнікі Вялікасельскага сельскага Дома культуры. Яны завіталі ў прышкольны лагер і правялі конкурсна-гульнявую праграму “Ці ведаеш ты правілы дарожнага руху?”.

Гэтай жа тэме прысвяціў гульню “Правілы руху дастойны павагі” Ліноўскі сельскі Дом культуры, на якую запрасіў выхаванцаў прышкольнага лагера.

Спартыўная праграма “Летам няма калі сумаваць” адбылася ў прышкольным лагеры Шарашоўскай сярэдняй школы. Яе правялі работнікі мясцовага цэнтра культуры і вольнага часу.

Пазнаёміцца з выдатнымі мясцінамі роднага краю прапанаваў Рудніцкі сельскі клуб-бібліятэка. Сумесна са святаром Анатолем Кавальскім для рабят, якія адпачываюць у аздараўленчым лагеры “Юны турыст”, яны правялі экскурсію па аграгарадку і храме Пакрова Прасвятой Багародзіцы.

Ствараць прыгажосць сваімі рукамі вучыліся ў Новазасімавіцкім сельскім Доме культуры. Кіраўнік гуртка дэкаратыўна-прыкладнога мастацтва А.Качанава навучыла дзецей вырабляць сувенір “Вожык” з прыроднага матэрыялу.

У Навасёлкаўскім сельскім Доме культуры прайшоў майстар-клас па рукадзеллю “Бабуліна навука”. Кіраўнік гуртка Л.Яроцкая паказала хлопчыкам і дзяўчынкам як ткаць на кроснах, а Народны майстар Беларусі М.Кулецкая – рабіць уручную паясы.

Вольны час – гэта магчымасць наведаць бібліятэку і даведацца шмат новага, карыснага, цікавага.

Падчас святочных дзён з нагоды Троіцы ўстановы культуры і калектывы аматарскай творчасці зладзілі канцэртныя праграмы.

На мінулым тыдні ў Ружанскім палацавым комплексе роду Сапегаў адкрылася персанальная выстава мастацкіх работ Марыны Мары (Канавалавай) «Rosarium».

Дзіцячыя гады мастачка правяла ў Нарыльску. У 1986 г. яна закончыла мастацка-графічны факультэт Віцебскага дзяржаўнага універсітэта, у 2014 г. – факультэт графічнага дызайну Беларускай дзяржаўнай Акадэміі мастацтваў.

Марына Мара лічыць сябе паслядоўніцай віцебскай мастацкай школы. Яна прызнаецца ў любові да такіх вядомых майстроў пэндзля як М.Дабужынскі, З.Серабракова, Г.Астраумава-Лебедзева. Яе разуменню таксама блізкія М.Шагал і К.Малевіч.

Марына ў розныя перыяды працавала ў станковай і кніжнай графіцы, аформіла больш за 15 кніг для дзяцей. Любоў да акварэлі спрыяла цікаўнасці да працы па шоўку. У 2010-х гг. яна нават стварыла брэнд аўтарскага роспісу па шоўку «Maramarina».

Любімая тэхніка мастачкі – пастэль, якая аб’ядноўвае пластыку ліній і колер. Мара працуе з натуры і пераасэнсоўвае ўбачанае ў кампазіцыях. Рэалістычныя эцюды яна лічыць прамежкавым этапам працы. Карціна – праява тэмпераменту мастака. Таму нават самая пяшчотная работа Марыны Мары выглядае актыўнай, бурнай па ўнутранаму зместу і містычнай.

Творчасць для мастачкі – гэта магчымасць стварэння свайго асаблівага свету, пошук гармоніі, мары, творчага палёту і асалоды.

Вынікам творчых пошукаў і працы мастачкі стаў удзел у рэспубліканскіх выставах жывапісу і міжнародных пленэрах у Літве, Латвіі, Польшчы, Чарнагорыі і Беларусі.

Выстава работ Марыны Мары (Канавалавай) «Rosarium» будзе працаваць у Ружанскім палацавым комплексе роду Сапегаў на працягу чэрвеня – ліпеня 2022 года.

Сёння ўдзельнікі ўзорнага клуба «Teens-фармат» правялі для выхаванцаў прышкольнага лагера сярэдняй школы № 1 вусны часопіс “Песняры зямлi беларускай”, прысвечаны творчасці Народных паэтаў Янкi Купалы і Якуба Коласа і Году гістарычнай памяці. Дарэчы, хутка будзе адзначацца 140-годдзе з дня нараджэння абодвух вялікіх людзей.

У мінулую нядзелю адзначалася адно з галоўных хрысціянскіх свят – Троіца. Да гэтага дня ўстановы культуры прымеркавалі шэраг мерапрыемстваў.

Установы культуры, якія знаходзяцца ў сельскай мясцовасці, ладзяць мерапрыемствы як самастойна, так і сумесна з іншымі.