Нішто не збліжае людзей так, як мастацтва. Гэты вядомы выраз работнікі Пружанскай цэнтральнай раённай бібліятэкі імя Міколы Засіма ўзялі за дэвіз пры правядзенні ўжо традыцыйных бібліяпрыцемкаў, якія адбыліся 23 верасня. У гэтым годзе яны мелі назву “Мой родны кут” і сталі своеасаблівым завяршэннем Тыдня роднай мовы.
Распачалася сустрэча з яе Вялікасці Паэзіі. Аматары мастацкай літаратуры пазнаёміліся з выставай твораў паэтаў-землякоў Міколы Засіма, Міколы Купрэева і Міколы Антаноўскага, прачыталі іх вершы.
Далей можна было палюбавацца вышытымі карцінамі пружанкі Ірыны Пасевіч, вязанымі сурвэткамі і вышыўкамі іншых майстрых. А таксама дакрануцца да сапраўданай гісторыі на выставе вядомага і аднаго са старэйшых беларускіх часопісаў “Алеся”, на якой былі прадстаўлены нумары выдання за розныя гады.
На этнаграфічнай пляцоўцы “Спрытныя, кемлівыя, хуткія”, якую падрыхтавалі вучні Ліноўскай сярэдняй школы разам з настаўніцай Л.Бяскроўнай, любы жадаючы, але, найперш, дзеці і падлеткі, з задавальненнем паўдзельнічалі ў беларускіх народных гульнях.
Не абыйшлося і без творчай майстэрні: рабяты ўласнаручна стварылі арганайзеры, а падчас гэтага занятку яшчэ і адказалі на пытанні па беларускай мове і літаратуры, а таксама пашырылі свае веды аб побыце сялян і шляхты перыяду Вялікага княства Літоўскага.
Завяршальным і яркім акордам свята ведаў і мастацтва стала сапраўднае музычнае шоу – гасцёўня “Песні, праспяваныя сэрцам”. У ім прынялі ўдзел бібліятэкары Пружанскага раёна, а таксама госці і калегі з Бярозаўшчыны і гурт “Фантазія” з г.Кобрын.
Прыходзьце ў бібліятэку, там вы сустрэнеце цікавых, творчых і разумных людзей, далучыцеся да сапраўднай прыгажосці і мудрасці пакаленняў!