28 лютага – 3 сакавіка ўзорны ансамбль народнага танца «Круцёлачкі» (кіраўнік Аксана Васільеўна Ільюшонак) дзяржаўнай установы культуры «Пружанскі раённы цэнтр культуры» прыняў удзел у XI Міжнародным фестывалі-конкурсе харэаграфічнага мастацтва «Зажги свою звезду» ў г.Казань (Расія).

Прэстыжны фестываль праводзіўся Міжнародным творчым праектам «Светоч» пры падтрымцы Федэральнага агенцтва па справах Садружнасці Незалежных Дзяржаў (Рассупрацоўніцтва, г.Масква), дыпламатычных прадстаўніцтваў Расійскай Федэрацыі за рубяжом (Казахстан, Балгарыя).

Пружанскі калектыў неаднаразова паспяхова выступаў на гэтым фестывалі і ўжо заслужыў аўтарытэт і павагу яго арганізатараў, аб чым сведчыць асобнае запрашэнне ансамблю да ўдзелу ў конкурсе.

У гэтым годзе «Круцёлачкі», як звычайна, годна прадставілі Беларусь і родны горад на конкурсе ў Казані. Майстэрства юных пружанскіх танцораў кампетэнтнае журы адзначыла трыма Дыпломамі лаўрэатаў І ступені ў намінацыі «народны танец» ва ўзроставых групах 8 – 10 і 11 – 14 год, а таксама змешанай групе (11 – 16 год). Да таго ж узорнаму ансамблю была ўручана спецыяльная ўзнагарода Федэральнага агенцтва по справах СНД у знак падзякі за высокую творчую і прафесійную арганізацыю работы аматарскага калектыву.

Акрамя незабыўных эмоцый і уражанняў, якія маленькія пружанцы атрымалі непасрэдна ад конкурснай праграмы, яны змаглі бліжэй пазнаёміцца з культурнай спадчынай аднаго з рэгіёнаў Расіі – Рэспублікі Татарстан, наведаць творчыя лабараторыі і майстар-класы ад вядучых спецыялістаў харэаграфіі міжнароднага ўзроўню і, канечне, набыць новых знаёмых і сяброў.

Узорны ансамбль народнага танца «Круцёлачкі» выказвае падзяку за дапамогу ў арганізацыі ўдзелу калектыву ў Міжнародным фестывалі-конкурсе харэаграфічнага мастацтва «Зажги свою звезду» (г.Казань) старшыні Пружанскага раённага выканаўчага камітэта Міхаілу Міхайлавічу Грышкевічу, а таксама аддзелу культуры райвыканкама, Пружанскаму раённаму цэнтру культуры, ААТ «Пружанскі льнозавод», бацькам юных танцораў.