На мінулым тыдні ў Пружанскай цэнтральнай раённай бібліятэцы імя М.Засіма адбыўся раённы семінар «Папулярызацыя чытання: зберагаем традыцыі, шукаем новае».

Мерапрыемства адкрыла дырэктар цэнтралізаванай бібліятэчнай сістэмы Т.Р.Гуторкіна. Яна адзначыла важнасць тэмы семінара, падкрэсліла шматграннасць функцый бібліятэк на сучасным этапе, адной з якіх застаецца папулярызацыя кнігі сярод насельніцтва.

Загадчык аддзелам маркетынгу, сацыякультурнай дзейнасці і метадычнай работы І.А.Кетрык пазнаёміла прысутных з новымі формамі працы з дзецьмі і моладдзю, магчымасцямі Інтэрнэт-тэхналогій у распаўюджанні кніжнага слова.

Метадыст узгаданага аддзела Н.М.Куцюк прааналізавала вынікі анкетавання «Чытанне ў жыцці дзяцей і падлеткаў – чытачоў бібліятэк».

Спецыялісты філіялаў «Ліноўская сельская бібліятэка» і «Калядзіцкая сельская бібліятэка» падзяліліся з калегамі сваім вопытам, набытым падчас вучобы на курсах павышэння кваліфікацыі.

На семінары ў on-line-рэжыме адбылася сустрэча з метадыстам па рабоце са школьнымі бібліятэкарамі г.Астана (Казахстан) А.Б.Байтэміравай. Яна расказала аб творчых праектах, якія рэалізуюцца ў Казахстане дзеля пашырэння чытання.

Семінар завяршыўся інтэлектуальнай гульнёй «Літаратурнае лато» і абмеркаваннем актуальных пытанняў працы бібліятэк.