Клубныя ўстановы праводзяць мерапрыемствы, разлічаныя на розную ўзроставую аўдыторыю.

Так, Велікасельскі сельскі Дом культуры напярэдадні выбараў зладзіў у фае выставу работ мясцовых майстроў народнай творчасці «З нітак казку стварыўшы». А непасрэдна ў асноўны дзень галасавання творчыя калектывы ўстановы правялі канцэрт «Мой дом – Беларусь».

Канцэрт «Ты наш гонар – Беларусь!», прымеркаваны да выбараў, адбыўся ў Мураўскім сельскім Доме культуры.

Белавусаўшчынскі сельскі клуб-бібліятэка арганізаваў канцэрт «З добрым настроем выбіраем заўтрашні дзень».

Шарашоўскі цэнтр культуры і вольнага часу ў асноўны дзень галасавання правёў канцэртныя праграмы «Мы – за шчаслівую будучыню!» ў клубнай установе і сярэдняй школе. Ва ўстанове культуры на працягу студзеня экспанавалася выстава «Беларусь – мая Радзіма». Цэнтр культуры з экскурсіяй наведалі школьнікі і пазнаёміліся з яго працай.

А вучні Велікасельскай базавай школы прыехалі з экскурсіяй у Навасёлкаўскі сельскі Дом культуры. Асаблівыя ўражанні яны атрымалі ад сустрэчы з народным майстрам Беларусі Людмілай Яроцкай, якая раскрыла сакрэты традыцыйнага ткацтва і вышыўкі.

Вечарына карысных парад «Жыццё цудоўнае, не марнуй яго дарма» прайшла ў Слабудскім сельскім Доме культуры. Падлеткі разам з работнікамі клубнай установы паразважалі аб адмоўным уздзеянні шкодных звычак.

Не забыліся і пра ўшанаванні імяніннікаў. Аўтаклуб павіншаваў з юбілеем ветэрана сферы культуры Г.В.Кароль з в.Бакуны. Работнікі Калазубскага сельскага клуба-бібліятэкі наведалі з творчым падарункам мясцовую жыхарку К.Русак, якая святкавала дзень нараджэння.