Насычаны на мерапрыемствы тыдзень выдаўся ў Пружанскай цэнтралізаванай бібліятэчнай сістэме.

Паспрабаваць разабрацца ў праблемах падлеткаў прапанаваў дзіцяча-юнацкі аддзел Пружанскай цэнтральнай раённай бібліятэкі імя М.Засіма, які запрасіў гімназістаў-васьмікласнікаў на гутарку з псіхолагам Н.Ю.Мураўскай «Крызіс пераходнага ўзросту». Рабяты пачулі шмат карысных парад і адказаў на хвалюючыя пытанні.

Да Дня воінаў-інтэрнацыяналістаў цэнтральная раённая бібліятэка прымеркавала краязнаўчую гадзіну «Выбраннікі неспадзяванай вайны», на якой вучні аграрна-тэхнічнага каледжа пазнаёміліся з землякамі, якія загінулі ў час вайны ў Афганістане. Для выхаванцаў прышкольнага лагера сярэдняй школы № 1 бібліятэкары падрыхтавалі пазнавальна-гульнявую праграму «Пароль адважных – 101», а для вучняў сярэдняй школы  № 5 – пазнавальную праграму «Дзіўны дар – імя».

Бібліятэкі не абыйшлі ўвагай Міжнародны дзень роднай мовы.

Цэнтральная раённая бібліятэка імя М.Засіма запрасіла вучняў аграрна-тэхнічнага каледжа паўдзельнічаць у інтэлектуальнай гульні «Роднае слова».

У Ружанскай гарпасялковай бібліятэцы прайшла гульня-конкурс «Ведай і любі родную мову» для васьмікласнікаў мясцовай сярэдняй школы.

Літаратурная гадзіна «Дзіўнае роднае слова» адбылася ў Ліноўскай сельскай бібліятэцы. Дзеці не толькі пачулі аповед аб гісторыі свята, але і адказалі на пытанні віктарыны, пачыталі вершы, пазнаёміліся з кніжнай выставай «Да роднай мовы крок зрабі». Таксама ў бібліятэцы прайшла арт-гадзіна «Чароўная моц мастацтва», прысвечаная вялікім рускім і беларускім мастакам.

Пружанская гарадская бібліятэка для другакласнікаў сярэдняй школы № 5 правяла вандроўку па старонках беларускіх кніг «Гучы родная мова», а для першакласнікаў прапанавала эка-інфармацыю «Бярэзінскаму біясфернаму запаведніку – 100 год».