У верасні 2021 года завяршыліся рамонтныя работы на воінскім пахаванні № 174, якое знаходзіцца ў аграгарадку Вялікае Сяло.

Добраўпарадкаванне мемарыяльнага месца прайшло ў некалькі этапаў. Так, у мінулым годзе, дзякуючы дапамозе адкрытага акцыянернага таварыства “Вялікасельскае Агра”, падыход да помніка быў выкладзены тратуарнай пліткай. Сёлета, частка фінансавых сродкаў, заробленых на раённым суботніку, была выкарыстана на рамонт самога абеліска. Была ўмацавана, атынкавана и пафарбавана стэла, на якой абнавілі мемарыяльныя пліты. Адрамантавалі бетонную тумбу перад помнікам, абліцавалі яе пліткай. На тумбе таксама размясцілі новыя мемарыяльныя пліты. На іх нанеслі 32 імя (раней было 27) пахаваных у брацкай магіле воінаў Чырвонай Арміі і партызан, а таксама 97 (раней было 66) жыхароў вёсак Вялікае Сяло, Юхнавічы і Ялова, якія загінулі на акупіраванай тэрыторыі і франтах Вялікай Айчыннай вайны.

Трэба адзначыць, што, дзякуючы пошукавай рабоце, удалося выправіць памылкі ў шэрагу імёнаў, а таксама ўстанавіць звесткі аб 5 ваеннаслужачых і 31 мясцовым жыхары, якія раней адсутнічалі. На жаль, імёны 24 пахаваных у брацкай магіле воінаў-чырвонаармейцаў пакуль застаюцца невядомымі.

Работы па добраўпарадкаванні воінскіх пахаванняў на Пружаншчыне працягваюцца.