Пачатак і заканчэнне навучальнага года – дзве самыя значныя падзеі ў жыцці кожнай школы. Паміж імі – карпатлівая творчая праца настаўнікаў і вучняў пры падтрымцы бацькоў. Але прыходзіць дзень, калі ўсеагульнай увазе прадстаўляецца вынік работы калектыва.

У мінулую нядзелю ў Новазасімавіцкай дзіцячай школе мастацтваў адбыўся выпускны і справаздачны канцэрт «Планета дзяцінства». Цёплы майскі дзень сабраў поўную залу гледачоў. Гэта было сапраўднае свята музыкі. Сольныя вакальныя і інструментальныя нумары змянялі ансамблі вучняў і настаўнікаў, выступленні харавых калектываў, гучалі вершы аб музыцы і музыкантах.

Дырэктар школы М.Л.Кузьміч падзякавала настаўнікам, рабятам за выдатную вучобу і ўдзел у розных конкурсах, адзначыўшы іх граматамі і падзякамі.

Самым урачыстым момантам стала ўручэнне пасведчанняў аб заканчэнні Новазасімавіцкай дзіцячай школы мастацтваў. У гэтым годзе ўстанову закончылі дзевяць выпускніц. Яны атрымалі дакументы і кветкі, выканалі для настаўнікаў развітальную песню. Бацькі ўзнагародзілі кожнага педагога “падзячнымі лістамі” і кветкамі.